J.M. Udakiola

Jon Mikel Udakiola Donostian 1965 urtean jaiotako irudigilea, animazio marrazkilaria, argazkilaria, ilustratzailea eta pintorea da, komikigintzan ere aritu dena. Hernanin bizi da.

https://jmudakiola.wordpress.com webgunean bere ibilbideari biuruzko informazio zabala dago eta bere lan batzuk eskuratu daitezke ere.

1991tik Gasteiz, Madrid, Paris eta Bartzelonan animazio estudio ezberdinekin egin zuen lan: Dibulitoon, Walt Disney… Besteren artean Ipar haizearen erronka filmarako lan egin zuen.

1996ean animazioaren alorreko Sirimiri films produktora sortu zuen eta 2005 urterarte hainbat proiektu garatu zituen.

Irakasle izan da Ceimpro ikastetxean eta Sirimiri Films bidez ere,

Ikastolen Elkarterako animazio eta ilustrazio lanak egin ditu.

ILUSTRAZIOA ETA KOMIKIGINTZA

1993 urtean Piriniology lana sortu zuen, eta 2010ean Skybo izenekoa.

2013an  III. Rekalde-Ortzadar Komiki Lehiaketa bi autoreri ematea erabaki zen: batetik  Piedad Ortiz de Urbinak jaso zuen saria eta bestetik Jon Mikel Udakiolak, ‘Txorimaloa’ izeneko komikiagatik. Rekalde aretoan erakutsi zituzten haien lanak.

Garai berean Aritz Truebaren bidez Buyan komikia garatzen ari zen egile taldera batu zen.

Truebak Usandizaga ikastetxeak ilustratzaile ezberdinei egindako elkarrizketa sailean kontatu zuenez, elkarlanean jarraitzeko gogoa piztu zitzaien.

" Beraiek bazuten ideia bat, mitologia, gertakari historikoak eta abenturak nahasten zituen argumentu bat, eta horri heldu genion.

Animazio bat egitea zen hasieran asmoa, baina gerora, istorioak zeukan luzera eta ezaugarriak kontutan hartuta, beharbada komiki formatuan egitea egokiagoa zela ikusi genuen. Ikastolen elkarteko lankide dudan eta Sirimiri Films eskolan nire irakasle izandako Jon Mikel Udakiolaren esperientzia eta ekarpena ere erabakiorra izan zen komikiaren alde egiteko apustu horretan."..." Ondoren Josu Igoa informatikaria –ikastolen elkarteko lankidea bera ere- bildu genuen taldera, proiektuak teknologi berrien arloan ere dimentsio sendoa eduki zezan."

Horrela Bortz taldea sortu zuten eta Buyan komikian lanean buru belarri jarri ziren. https://m.facebook.com/buyancomic/ Facebook-ean proiektuaren bilakaera erakutsi dute.

Buyan komikia horrela deskribatu dute "XIII mendeko errusiar printzerri batean kokatzen da komikia. Bertan  Nenetsiako tundratik hildako bere maitea berreskuratu nahian Buyan uharte mitikora iritsi nahi duen Maansi gaztearen gorabeherak ezagutuko ditugu, datu historikoak eta mitologia eslabiarra nahasten dituen istorio original honetan"

Argitaletxea bilatzen hasi aurretik hasi ziren komikiaren gidoi, zirriborro eta atal batzuekin lanean. Frantsesez eta ingelesez Komikia argitaratzeko gestioetan ari dira eta Aritz Truebak Eusko jaurlaritzak komikigintza sustatzeko diru laguntzen deialdiko laguntza Jaso du.

2013tik 2017ra bitarte euskaraz eta beste hizkuntzetan lan ugari sortu ditu: Lastategia, Nikolino musikaria, Telmo Pirata, Garaipen Beltza... bere testuetan oinarrituak batzuk eta beste asko Xabier eta Martin Etxeberria anaien testuekin.

2017 urtean Txipibooks on line zigilu editoriala sortu zuen, bere komiki eta liburuak edo beste autore batzuenak argitaratzeko plataforma izan nahi duena.

Horrela argitaratu zuen 2017an Mordillo marrazkilaria inspirazio iturri hartuta Jon Mikel Udakiolak 90ko hamarkadan sortutako 12 ilustrazioak, Txomin, Txirulo eta Latxa izenburupean.

2018an Etxe berria/Gazta ipuinak saila hasi zuen, gazteleraz eta ingelesez ere argitaratu ditu.

2018an 7 korapilo nobela grafikoa argitaratu zuen (gazteleraz 7 nudos, frantsesez 7 Noeuds ). Komikigunean egin zen aurkezpena eta erakusketa egin zen Egiako Apal denda eta estudioan

2018ko apirilean elkarrizketatu zituzten Berria Egunkarian J.M Udakiola eta Martin Etxeberria eta autoedizioari buruz ere hitz egin zuten

DATA	IZENBURUA	ARGITARATZAILEA	GIDOIA	MARRAZKIAK	JATORRIZKO HIZKUNTZA	ITZULTZAILEA	JATORRIZKOAREN URTEA
2018 02 OTSAILA	7 korapilo	Txipibooks	J.M. Udakiola Martin Etxeberria Garro Xabier Etxeberria Garro	J.M. Udakiola	Edizio elebiduna (Eusk/Gazt)		2018 7 korapilo / 7 nudos