Unai Iturriaga

UNAI ITURRIAGA ZUGAZA-ARTAZA

Unai Iturriaga Zugaza-Artaza Durangon jaio zen 1974ean. Bertsolari bezala ibilbide oparoa du, baina kulturgintzako esparru anitzetan aritutakoa da, tartean komikigintzan: gidoilari gisa Sanvi marrazkilariarekin 3 album argitaratu ditu (hauetako 2 Xabiroi aldizkarirako sortutako Haur Besoetakoa sailekoak) eta umore grafikoa egin du, batetik H28 saretirikoan eta bestetik Gara egunkariko Gaur8 astekarian eta eguneroko Komiki zinta egiten 2019ko ekainaren 3tik aurrera, Tasiok zeregin hori utzi eta gero

Bertsolaritzan oso gazte hasi zen eta badirau, baina arlo ezberdinetan aritu izan da: Islada eta Berandu da gelditzeko liburuak idatzi zituen, 7 Eskale eta Gu ta gutarrak musika taldeetako kidea izan da, zinema gidoilari Olentzero eta subilaren lapurreta, Munduaren bira doan eta Eutsi! filmetan, eta 2017an Francoren bilobari gutuna antzezlanaren gidoia Igor Elortzarekin batera idazteagatik Donostia Antzerki Saria irabazi zuen.

KOMIKIGINTZA

90. hamarkadan Arte Ederrak ikasi zituen, eta marrazkigintzan aritu arren soilik azken urteetan argitaratu ditu Komiki lanak.

2007ko azaroan Xabiroi aldizkariaren 10. zenbakian Haur Besoetakoa sailari hasiera eman zitzaion. Unai Iturriaga arduratu zen gidoiaz eta Sanvi irudietaz. Horrela kontatu zion Iturriagak Argiari bere komikigile ibilbidean giltzarri bilakatu zen unea:

Xabiroi komiki-aldizkariaren erruz nago tirak egiten. Betidanik naiz komiki zalea, Ipurbeltz umetatik ezagutu dut etxean, marraztea gustuko dut, anaia nagusia marrazkilari ona da… Bolada batez aldendu egin nintzen, 2007an Dani Fanoren proposamena jaso nuen arte, Xabiroi-rako gidoiak egiten hasteko. Ondoren etorri zen H28 aldizkari satirikoan kolaboratzen hastea, Xabiroi-ren inguruko unibertso horretan… Horiek gabe ez nintzateke Garan hasiko. Fanori izugarri eskerturik nago. Kabroi horrek aspaldi esan zidan, duela hamar urte-edo, H28n hasi aurretik: “Ikusiko duzu, hemendik ehun urtera zuri buruzko Wikipediako sarreran jarriko du ‘marrazkilaria’, eta ez ‘bertsolaria’”. Beti esaten diot honen guztiaren erru handiena berak duela. Izatez, gauza askoren errua du, euskal komikigintzaren loraldiarena tartean”.

Komikigintzan Iturriagaren gidoiaz eta Alex Sanviren marrazkiekin bi lan argitaratu dira, Udaberrik ankerrena (2011) eta Haur Besoetakoa: 2007 urtean Xabiroi aldizkarian argitaratzen hasi zen saila da hau eta 2014 urtean Litxarrerien Jauna albumean osorik merkaturatu zen, eta Xabiroi aldizkarian jarraipena izan dute pertsonaiaren abenturek.

Uberan webgunean azaldu ditu Sanvirekin egindako lanari eta komikigintzari buruzko iritziak Apurka apurka komiki marrazkilari bezela urratsak ematen hasi zen, eta 2013 urteko Bertsolari Txapelketa Nagusiko kanporaketei buruzko komiki labur batzuk egin zituen.

2015 urtean Alfonso Zapiko asturiarraren marrazkiekin Diamanteak Urrea eta Ikatza komikia argitaratu zuen Athletic Club Fundazioaren eskutik.

2016 urtean Altza Porru komiki lan kolektiboan hartu zuen parte.

H28 Aldizkarian Zugaz/art izenpean komikiak argitaratzeari ekin zion, tartean Piko ta Payo eta Dizerdio/Goroldio bikoteen istorioak.

Jakin eta Gaur8 aldizkarietan ere argitaratu ditu komikiak, azken honetan Amaia Ballesteros, Exprai eta Axpirekin Irritzia atala partekatuaz.

2017an Jon Maiaren Berriak jaio ginen libururako ilustrazioak eta umore grafikoko marrazkiak egin zituen.

2018ko urrian kaleratu zen Haur Besoetakoa sailaren album berria: Paristik datorren artista.

2019ko otsaileko Xabiroi aldizkariaren 51. zenbakian Haur Besoetakoa pertsonaiaren komikien 3. Istorioen sailari hasiera eman zioten.

20 urtez Javier Etayo"Tasiok" euskal prentsan egindako ibilbidea amaitu eta gero, 2019ko ekainaren 3tik aurrera Gara egunkarian iritzia saileko eguneroko binetaz arduratzen da Unai Iturriaga Zugazart izenpean

2019an Zaldi urdina antzezlana estreinatu zen, Unai Iturriaga eta Igor Elortzaren testuekin.

Euskaraz argitaratutako komikiak

DATA	IZENBURUA	ARGITARATZAILEA	GIDOIA	MARRAZKIAK	JATORRIZKO HIZKUNTZA	ITZULTZAILEA	JATORRIZKOAREN URTEA
2018 10 URRIA	Paristik datorren artista Haur Besoetakoa 2	Ikastolen Elkartea/Xabiroi	Unai Iturriaga	Alex Sanvi	Euskaraz Jatorrizkoa		Hasiera 2015eko urrian, Xabiroi aldizkariaren 37. zenbakian eta ondoren atalka 38,40,41,43,45 zenbakietan eta amaiera 2014ko urriko 46. zenbakian.
2015	Diamanteak Urrea eta Ikatza	Athletic Club Fundazioa	Unai Iturriaga	Alfonso Zapico	Euskaraz Jatorrizkoa		2015 10 URRIA
2014 10 URRIA	Haur besoetakoa: Litxarrerien jauna	Ikastolen Elkartea/Xabiroi	Unai Iturriaga	Alex Sanvi	Euskaraz Jatorrizkoa		2007ko azaroan hasiera Xabiroi aldizkariaren 10. zenbakian eta ondoren atalka 17,19,21,22,28, 30 zenbakietan eta amaiera 2014ko urriko 33. zenbakian. Albumerako azken orrialde bat sortu zuten espreski)
2011	Udaberririk ankerrena	Elkar (Durango 1936 Kultur Elkartearen ekimenez)	Unai Iturriaga	Alex San Vicente Sanvi	Euskaraz jatorrizkoa		2011
GUZTIRA : 3 KOMIKI

Beste komikigileekin partekatutako komikiak

DATA	IZENBURUA	ARGITARATZAILEA	GIDOIA	MARRAZKIAK	JATORRIZKO HIZKUNTZA	ITZULTZAILEA	JATORRIZKOAREN URTEA
2016 04 APIRILA	Altza porru	Komunikazio Biziagoa / Argia	Obrarena Jakoba Errekondo Komiki bakoitzarena: Ainara Azpiazu Axpi, Asisko, Joseba Larratxe Josevisky, Iñaki Martiarena Mattin, Olariaga, Unai Gaztelumendi, Unai Iturriaga, Zaldieroa	Ainara Azpiazu Axpi, Asisko, Joseba Larratxe Josevisky, Iñaki Martiarena Mattin, Olariaga, Unai Gaztelumendi, Unai Iturriaga, Zaldieroa	Euskaraz jatorrizkoa		2016 04 APIRILA