Jon Lorente

Jon Lorente 1981 urtean Donostian jaiotako Yoga irakaslea da. Ikus-entzunezko Komunikazioan lizentziatu zen eta zinema, komikia eta arte eszenikoen zalea da.

Maite Rosende irudigilearekin, 2022 urtean 'En Guruji'/'Guruyi' komikia sortu zuen. Bang!/Mamut argitaletxearen eskutik gaztelaniaz, katalanez eta frantsesez argitaratu zen: ariketei buruzko informazioa eta karta jokoa ere barnebiltzen ditu komikiak. Denonartean argitaletxeari esker euskaratu zen 'Guruyi'.

Irutxuloko Hitzak egileak elkarrizketatu zituen. Aldizkarian komiki eta karta jokoen irudi ederrak agertzen dira, eta jarraian elkarrizketako eduki batzuk laburtu ditugu:

Lorente irakaslea da 802 yoga estudioan, eta haurrentzako yoga eskolak ematen ditu Herri Ametsa ikastolan. 2016an hasi zen irakasle moduan, haurrekin lehendabizi: «Haurrekin errazagoa iruditu zitzaidan, harreman ona dut beraiekin. Ordea, haurren klaseetarako material gutxi topatu nuen». Hain zuzen, berarentzat hori izan da komiki bat egiteko «aitzakia», haurrei yoga gerturatzea: «Komikizalea naiz, eta banekien inoiz komikiren bat eginez gero yogari buruzkoa izango zela».

Lorentek yoga erabiltzeko karta jolas bat eskuratu zuen ingelesez, eta ikasleekin probatu zuen: "Jolasaren bidez lortzen duzu haurrek yoga egitea, oso ondo funtzionatzen du. Arnasketa ariketak, kontzentrazio ariketak, posturak bikoteka, postura indibidualak… Karten alde batean praktika egiteko marrazkiak daude, eta horiek egiteko azalpen guztiak datoz beste aldean."

Rosendek marraztu zituen kartetan ageri diren pertsonaiak, eta, ondoren komikian gehiago garatu dituzte. "Pentsatu genuen kartak ikusi ondoren haurrek agian gehiago jakin nahiko zutela protagonisten inguruan, eta istorio horiek garatu ditugu komikian."

Urte batzuetako prozesua izan zen proiektu hau, gorabehera handikoa "Asko ikasi dugu. Pandemian asko aurreratu ahal izan genuen. Esperientzia polita izan da, baina babes ekonomikorik gabe oso zaila izan da."

EUSKARAZ ARGITARATUTAKO KOMIKIAK

DATA	IZENBURUA	ARGITARATZAILEA	GIDOIA	MARRAZKIAK	JATORRIZKO HIZKUNTZA	ITZULTZAILEA	JATORRIZKOAREN URTEA
2022 11 AZAROA	Guruyi Yogaren inguruan abentura bat	Denon Artean Cenlit	Jon Lorente	Maite Rosende	Jatorrizkoa gazteleraz	Josu Jimenez Maia	2022 Bang!/Mamut argitaletxearen eskutik gaztelaniaz, katalanez eta fransesez