Asisko

Asisko Urmeneta Otsoa Errarteko 1965 urtean Iruñean jaiotako komikilaria da.

Wikipediaren arabera, 80. hamarkadan Napartheid fanzinean hasi zuen bere ibilbidea, honen sorkuntzan parte hartuaz ZaldiEroarekin batera . Argia aldizkarian urte askotan kolaborazioak egin ditu, Egunkaria eta Berrian ilustrazio lanak...

Napartheid fanzinearen bidez 1988 urtean 'Hegoekialde Urruneko Legenda' komikia argitaratu zuen; ondoren 1994ean Arturo Campion Kultur Elkarteak argitaratu zuen 'Erraondo' (La Habanako Palma Real Saria) eta hasiera batean Argia aldizkarian agertu ziren 1996 urtean 'I'm Pellot, Biba festa' albumean argitaratutuako komikiak.

Argia aldizkarian atalez atal argitaratu eta gero, 2003an 'Gartxot' albuma argitaratu zuen (Jokin Larrea eta Marko Armspachekin batera, Adur Larrearen koloreekin; Aiacciuko Komikiaren Nazioarteko 7. Jaialdiaren baitan Korsika Hegoaldeko Kontseilu Nagusiak Ezagutzaren Domina eman zien autoreei) eta 2010ean 'Okatxu hegal egiten' (Mattin Irigoienen gidoiaz eta Adur Larrearen koloreztatze lanarekin).

Komikigintzaz gain, Zazpiak Batman kolektiboko kidea izan Kike Amonarriz eta Antton Olariagarekin batera; Mantxut liburuak sortu zituzten eta Euskal Herrian zehar ikuskizunak eskaini.

Negu Gorriak taldearen 'Borreroak baditu milaka aurpegi' diskaren liburukian kanta bakoitza Asiskoren komiki batekin ilustratua dator. Marko Armspach-ekin batera Kutxuflet izenpean 'Marijane kanta zan!' Oskorriren diskarako kantak egin zituen. Pottokaren diskaren azala eta Sagarroi taldearen logoak egin zituen.

2001ean Pernanekin 'Nora hoa, xirimola?' eta 2003an Aitor Txarterinaren marrazkiekin 'Sugea lilipean' liburuak egin zituen.

ETB1 telebista-kateko 'Mihiluze' eta 'Gure kasa'saioetan karikaturak egin zituen. Zinemagintzan Juanjo Elordirekin batera 'Munduaren bira 80 egunetan, doan' eta 'Gartxot, konkista aitzineko konkista' filmak zuzendu zitueneta Edorta Barruetabeñarekin izen bereko liburua osatu zuen.

2015eko urtarrilean, Charlie Hebdo Frantziako aldizkari satirikoaren aurka egindako erasoen arira, Berriako Iñigo Astizek solasaldi baterako elkartu zituen Pa­txi Huarte, Marko eta Asisko Urmeneta marrazkilariak eta euskaraz aldizkari satiriko baten hutsunea zegoela nabarmendu zuten: handik gutxira, urtarrilaren 28an, 'H28' komiki hilabetekari saretirikoa agertu zen, 2017 urtea bitarte 28 ale eman zituena.

2016ean Jakoba Errekondoren "Altza porru" liburuan parte hartu zuen Asiskok beste marrazkilari hauekin batera: Ainara Azpiazu, Antton Olariaga, Mattin Martiarena, Unai Gaztelumendi, Unai Iturriaga eta Zaldieroa.

Argia aldizkarian kolaboratzaile aritu da hainbat urtez Gora Pro Nobis atalean, 2017an azken lana argitaratu zuen arte

Xabiroi Ikastolen Elkarteko aldizkarian Horkonpost saila marrazten du.

[Gure Berriak atari digitalean komiki zintak eta argazki muntaiak argitaratu ohi ditu]

2017 EUSKLABO ALAIAK ETA BASOLATIK BERRI ONIK EZ HASIERA XABIROI ALDIZKARIAN

2017 urtean 'Eusklabo Alaiak' albuma argitaratu zuen Gure Berriak komunikabidearen bidez. 2018ko ekainean 'Els EUSclaus feliços' katalanezko bertsioa argitaratu zen (Pol·len Edicions)

2017an Xabiroi aldizkarian 'Basolatik berri onik ez' sailaren lehen atala argitaratu zen: Asisko arduratu zen gidoiaz  eta Joseba Larratxe marrazkietaz; aldizkarian atalka argitaratu eta gero, 2020ko urrian publikatu zen albuma.

2017an Euskal Herriko Sormen sariaren lehen irabazle izendatu zuten Asisko Urmeneta, Lekeitioko Marabili jaialdian.

2018 AZTIHITZA

2018ko azaroan Asiskok `AztiHitza´ albuma argitaratu zuen, Agosti Xahoren bizitzan oinarritutako komikia. Erroa, Gure Berriak, Herrima eta Prefosta elkarteen arteko lankidetzaren emaitza izan zen argitalpena.

Etxepare Institutuaren bitartekaritzaz, 2019ko irailean Bruselan egin zen Fête de la BD komiki azokan parte hartu zuen Asisko Urmenetak. Aztihitza lana sinatzen egon zen, beste autoreekin batera erakusgai jarri zituzten bere lanak eta bi tailerretan hartu zuen parte.

Asisko Urmenetak 2019ko Euskadi Literatura Saria Ilustrazio modalitatean irabazi zuen Aztihitza komikiari esker. 2021 urtean gaztelerazko eta frantsesezko itzulpenak argitaratu ziren.

2019 NAFARROA BEHEREGAINA

2019ko azaroan Nabarralderen eskutik "1620 Nafarroa Beheregaina" komikia argitaratu zuen. Gure berriak atarian bideoan jaso ziren Asiskok komikiari buruz errandakoak.

2020 SUGARREN MENDE ETA BASOLATIK BERRI ONIK EZ ALBUMA

2020 urtean Gureberriak, Erroa argitaletxea eta Lapurdi 1609 elkarteen eskutik Asisko Urmenetak 'Sugarren mende' komikia argitaratu zuen: 1525etik 1616ra bitarte Erronkaritik Sakanaraino izan zen sorgin-ehiza du ardatz komikiak eta Lapurdin Logroñoko prozesua baino urte bat lehenago ere sorgin-ehizaren aitzakiapean jazarri zituzten herritarrak aipagai ditu.

2020ko urrian iritsi zen liburudendetara Asisko Urmenetak eta Joseba Larratxek Xabiroi aldizkarirako sortutako 'Basolatik berri onik ez' komikia

XABIROI WEBGUNEA KOMIKIAREN TEASERRA Musika: Julen Irazoki DAPA-ren bideoa

'Eusklabo Alaiak' eta 'Sugarren mende' komikiek bigarren edizio bat izan zuten.

2022 AMAIUR LIBERA STATE

Sarako idazleen biltzarrean aurre aurkeztu ondoren, 2022ko apirilaren 16an Amaiurko plazan 'Amaiur. Libera state' Asisko Urmenetaren komikia aurkeztu zen.

2022ko urrian 'Barruan gaude' EITBko Podcastean elkarrizketa luzea egin zioten

Asisko Urmenetaren ‘Amaiur! Libera State’ lana Korsikako Aiacciuko Nazioarteko Komiki Azokaren 20. edizioan sari bat jaso du. Portugalgo Central Commics atariak ere 'Prémio Especial Honorário' saria eman die Asisko eta Herrima argitaletxeari

2023 GORA EUSKAL HERRIENTSAK

2023 urtean Begiraleak EKE/ Herrima / Gure Berriak / Erroa elkarteen lankidetzari esker Asiskok 'Gora euskal herrientsak!' komikia argitaratu du, XX mende hasieran hezkuntzan eta kulturan aitzindari izan ziren emakumeak haintzat hartuta. Liburua argitaratu bezain pronto Donapaleun, Durangon eta Errenterian komikiaren aurkezpenak antolatu ziren, eta ordudanik herriz herri saio ugari egin ditu Asiskok.

Urtarrilaren 16an Iruñean aurkeztuko da komikia, goizean Arturo Kanpion euskaltegian eta arratsaldean Zaldikon

Irratia elkarrizketa France Bleun

Biba zuzek saioan elkarrizketa, 47. minututik aurrera.

LUR BARNEA musika proiektuak abesti eta bideoa egin zuen 'Gora Euskal Herrientsak' saiakera grafikoan oinarritua.

BASOLATIK BERRI HONIK EZ: BIGARREN LIBURUKIA

https://www.noticiasdegipuzkoa.eus/cultura/2024/03/31/joseba-larratxe-itzulia-kartela-komikigintza-euskaraz-8051913.html Joseba Larratxe ‘Josevisky’ Basolatik berri onik ez komikiaren bigarren liburuki bat plazaratzeko sortze lanetan ari da.

'NI EZ NAIZ SORGINA' DOKUMENTALA

Asisko Urmeneta dokumental baten sorkuntzan murgilduta dabil: 'Ni ez naiz sorgina. Suak errerik, keak gorderik' izenburupean garatzen ari den proiektuan besteren artean Aitor Karasatorre eta Eneko Gallartzagoitia diru lagun, eta 2025eko ekainean Auritzen estreinatuko da.

Ataungo VII. Mitoaldia programan hitz egin zuen egitasmo honi buruz

Elkarrizketa gazteleraz Noticias argitalpen taldean

Bideoa Vimeo atarian

Diru bilketa antolatu da proiektua sustatzeko.

2024: JOSEPH CAMINO SARIA

2024 urtean Asisko Urmenetak Joseph Camino saria jaso zuen. Azaroaren 16ean izan zen Hernanikomik jardunaldien baitan.Azaroaren 15etik 29ra, Biteri Kultur Etxean Asiskoren ibilbide profesionala erakusten duen lanen erakusketa ikusteko aukera izango da.

Etorkizuneko proiektuen artean, Asisko Urmenetak adierazi izan du Mireille Fanonekin elkarlanean aritzeko asmoa zuela proiektu berri batean, Eusklabo Alaiak komikiko protagonista ziren Robinson Crusoe eta Hazurbeltz tartean direla.

EUSKARAZ ARGITARATUTAKO KOMIKIAK

DATA	IZENBURUA	ARGITARATZAILEA	GIDOIA	MARRAZKIAK	JATORRIZKO HIZKUNTZA	ITZULTZAILEA	JATORRIZKOAREN URTEA
2023 Azaroa	Gora euskal herrientsak	Begiraleak EKE/ Herrima / Gure Berriak / Erroa	Asisko	Asisko	Euskaraz jatorrizkoa		2023 Azaroa
2022 Apirila	Amaiur. Libera State	Gaztelu Elkartea/ Herrima / Gure Berriak / Erroa	Asisko	Asisko	Euskaraz jatorrizkoa		2022 Apirila
2022 APIRILA	Amaiur 1522	Gaztelu Elkartea/ Herrima / Gure Berriak / Erroa	Asisko	Asisko	Hitzik gabekoa		2022 Apirila
2020	Sugarren mende	Gure Berriak / Erroa / Lapurdi 1609 elkartea	Asisko	Asisko	Euskaraz jatorrizkoa		2020 11 Azaroa
2020 10 URRIA	Basolatik berri onik ez	Ikastolen Elkartea/Xabiroi	Asisko	Joseba Larratxe Josevisky	Euskaraz Jatorrizkoa		lehen atala 2017ko otsaileko Xabiroi aldizkariaren 43. zenbakian eta 2020ko ekaineko 56. zenbakian azkena
2019	1620 Nafarroa Beheregaina	Nabarralde	Asisko	Asisko	Euskaraz jatorrizkoa		2019 11 Azaroa
2018 AZAROA	Aztihitza	Erroa / Gure Berriak /Herrima / Prefosta	Asisko	Asisko	Euskaraz Jatorrizkoa		2018 11 Azaroa
2017	Eusklabo alaiak	Gure Berriak	Asisko	Asisko	Euskaraz Jatorrizkoa		2017 10 URRIA
2010	Okatxu	Argia/Komunikazio Biziagoa Euskal Herriko Artzainak/Kukuxumuxu	Mattin Irigoien	Asisko (kolorea Adur Larrea)	Euskaraz Jatorrizkoa		2009/2010ean Argia aldizkarian atalez atal
2003 11 AZAROA	Gartxot	Argia/Komunikazio Biziagoa /Absurde	Asisko	Marko Armspach (marrazkiak) Jokin Larrea (kolorea)	Euskaraz Jatorrizkoa		2003ko Maiatzaren 18an Argia aldizkarian hasi ziren argitaratzen zatika eta ondoren argitaratu zen album moduan
1996 link=http://www.komikipedia.eus/index.php?title=I’am Pellot, Biba Festa	I’am Pellot, Biba Festa	Argia/Komunikazio Biziagoa	Asisko	Asisko	Euskaraz Jatorrizkoa		Argia aldizkarian hasi ziren komikiak argitaratzen zatika eta ondoren argitaratu zen album moduan
1994	Erraondo	Arturo Campion Kultur Elkartea / IKA	Asisko Arturo Campionen ipuin bat jatorri	Asisko	Euskaraz Jatorrizkoa		1994
1988	Hegoekialde urruneko legenda	Napartheid	Asisko	Asisko	Euskaraz Jatorrizkoa		1988ko neguan hasi zen atalka agertzen Naparthei fanzinean eta ondoren argitaratu zen album moduan

WEBGUNE ETA SARE SOZIAL PERTSONALAK

Asisko

* Intzuratik (Eusklabo Alaiak)

ELKARRIZKETAK,ARTIKULUAK...

• * 2012 Argia

• 2018/12/14 Elkarrizketa Ipar Euskal Herriko Hitza-n

• EITBkultura Transit saiorak elkarrizketa