Axpi

Ainara Azpiazu Aduriz "Axpi" Hernanin 1980 urtean jaiotako ilustratzaile eta marrazkilaria da. Soziologia lehenengo eta gero Arte Ederrak ikasi zituen EHUn. Italian Ars In Fabula, Master in illustrazione per l'Editoria ilustrazio masterra burutu zuen.

Hanbat komunikabidetan argitaratu ditu komikiak eta H28 aldizkari saretirikoan zein Tupust! antologian argitaratu ditu lanak. 2020ean bere lehen komiki albuma argitaratu zuen, Angel Rekalderen gidoiaz eta Nabarralderen enkarguz: 'Foixeko Katalina', eta 2022 urtean 'Utzi Azalari' eleberri grafikoa.

2005 urtetik aurrera komiki lehiaketa batzuetan sariak eskuratu zituen, adibidez Portugaleteko komiki lehiaketan, Ibarrako Galtzakomiken eta Arrasateko komiki ez sexisten lehiaketan.

Wikipediaren arabera, 2007tik aurrera lanbidetzat hartu ahal izan ditu ilustraziogintza, komikigintza, horma-irudigintza eta ume eta gazteekin tailerrak.

Hainbat liburutan aritu da ilustratzaile gisa 2010 urtetik aurrera gidoilari anitzekin: euskaraz, gazteleraz eta katalanez argitaratu dira bere lanak eta wikipedian zerrendatu dira

Gidoilari bezala, Paula Estévez Del Diego marrazkilariarekin 2017 urteko Etxepare saria irabazi zuen 'Arraroa' albumarekin. Etxepare Saria Sakanako Mankomunitatearen eta Nafarroako beste 20 erakundeen Euskara Zerbitzuek elkarlanean antolatzen dute eta haurrentzako euskarazko albumak sortzea helburu du.

Horma-irudi ugari egin ditu, Hernanin, Donostialdean eta Tolosaldean bereziki. 2018 urtean Hernaniko Pilotalekuan egindako muralaren sortze prozesuaren bideoa egin zuen.

Hainbat erakusketetan hartu du parte: Aieteko Kultur Etxeko 'Ilustratzailearen Txokoan', 2016 urtean Arian- Arian- izenekoan Hernanin...

Hernaniko sorkuntza bekari esker Maite Larburu musikari, abeslari eta artista hernaniarrarekin eta Oskarbi Sein ilustratzaile eta animatzailerekin "Arraila" kantuan oinarrituta animaziozko film labur bat egiten ari dira.

Euskal Herriko ikastoletako ikasleek bozka bidez ematen dituzten Juul sarietan bi aldiz izan da hautatua, '2019an 'Arraroa' eta 2023an Basoan Barna' liburuengatik.

KOMIKIGINTZA

2005 urtean Portugaleteko komiki lehiaketako euskarazko akzesita irabazi zuen.

2008an Ibarrako Galtzakomik komiki lehiaketako bigarren saria irabazi zuen eta 2012an lehen saria. Urte berean Arrasateko komiki ez sexisten euskarazko lan onenaren saria jaso zuen.

2008tik aurrera Hernaniko Kronikan argitaratu zituen lehen zintak, eta ondoren Berria, Irrien lagunak eta Gara egunkariaren Gaur8 gehigarrian kaleratu ditu bere komikiak, baita Gaztezulo eta Xabiroi aldizkarietan ere. Berriako Mantangorri gehigarrian parte hartzen du.

2015etik aurrera H28 saretirikoan parte hartu zuen. 'El Balanzin' komiki aldizkarian istorio batzuk argitaratu zituen.

2016ean Jakoba Errekondoren "Altza porru" liburuan parte hartu zuen beste marrazkilari hauekin batera: Antton Olariaga, Asisko, Mattin, Unai Gaztelumendi, Unai Iturriaga eta Zaldieroa.

Umore grafikoa eta komikigintza gai modura hartuta tailerrak burutzen ditu ume eta gazteekin. 

Urte horretan Parrapean komiki jardunaldietan hartu zuen parte Bilbon, Kataluniako eta Euskal Herriko marrazkilarien arteko norgehiagokan (partaideak: Oriol García, Sussana Martín, Axpi eta Josevisky).

2016an,"Tirabirak/Tiras que aflojan"izeneko proiekturako jaso ziren bere hitzak eta komikiak, beste hainbat marrazkilariekin batera euskal gatazka prentsako binetagileen ikuspegitik nola jorratu zen islatzeko asmoz. Urte horretan ere "Superwomen. Ohiko ikuspuntuari begirada berria" Tabakaleran egin zen jardunaldietan parte hartu zuen.

2017 urtean Axpi eta Iñaki Martiarena Mattin marrazkilariek Bruselako Fête de la BD komiki jaialdian parte hartu zuten Etxepare Institutuaaren eskutik eta haurrentzako tailerrak eskaini zituzten.

2018an 'Euskal komikiaren ibilaldia' ekimenean hartu zuen parte, Mikel Begoña komikiaren historian aditua, Unai Iturriaga, bertsolari zein marrazkilaria, eta eta Mikel Antero marrazkilariarekin.

Berriak egunkarian argitaratutako komikizketak ekimenean hartu zuen parte hurrenez hurren Unai Iturriaga eta Zaldieroa bikotetzat hartuta.

Xabiroirako elkarlanean eta bakarka argitaratu izan ditu lanak: 2015eko otsaileko 35. zenbakian ZaldiEroaren gidoiarekin 'Porrupatatak' 5 orriko istorioa argitaratu zuen eta 2017an orri bateko 'Zartadura' istorioa. 2019ko ekainean Tupust! aldizkariari buruzko elkarrizketa egin zioten Maitane Gartziandiarekin batera eta 'Sendabidea' istorioa publikatu zuen. 2020ko 55 zenbakian 'Jatekoa' komikia argitaratu zuen aldizkarian.

Gaur8rako sortutako zintak naiz.eus-en ikusgai daude. [ https://www.eitb.eus/eu/irratia/euskadi-irratia/programak/faktoria/osoa/6314915/tupust-kolektiboko-maite-gurrutxaga-eta-ainara-azpiazu-komiki-antologiaz/ Tupust kolektiboko kide da] eta 2019an lehen antologian komiki bat argitaratu zuen.

Gaztezulo aldizkarian komikiak argitaratu ditu ere.

2019ko neguan Hernanin komikigintza tailerra egin zuen eta Donostia eta Zumaian Ekialde Hurbileko Palestinar Iheslariei Laguntzeko Nazio Batuen Agentziak UNRWA-Euskadik antolatuta Palestinako errealitatea ezagutarazten laguntzeko gaztetxoentzako komiki tailerrak gidatu zituen.

2020ko maiatzean Italiako Bolognako Children’s Book Fair jardunaldiak ospatu ziren, eta euskal komikigintza hizpide izango zen egitarauaren barne, baina COVID19 pandemiaren baitan, azkenean hainbat ekitaldi streaming bidez egin behar izan ziren: Youtuben dago eskuragarri gazteleraz Kike Infameren gidaritza eta gidoiarekin Ainara Azpiazu "Axpik" eta Mikel Begoñak izandako solasaldia: 70. hamarkadatik XXI menderarte euskal komikigintzak egindako ibilbidea izan zuten hizpide, eta gaur egungo egoera aztertu zuten ere, Euskal Irudigileak elkartearen eskutik.

2020ean Nabarralderen enkarguz 'Foixeko Katalina' bere lehen komiki albuma argitaratu zuen Axpik, Angel Rekalderen gidoiaz. 

2021 urtean Tupust! kolektiboaren bigarren antologian argitaratu zuen istorio bat.

UTZI AZALARI

2017ko Bertsolari Txapelketa Nagusiko finalean Maialen Lujanbiok kantatutako hiru ber­tsoak gogoan zituela, Hernaniko Dobera elkarteko Jexux Eizagirrek elebrerri grafiko bat sortzeko proposamena egin zion 'Axpi'-ri, Kronikan egindako elkarrizketaren arabera

2017ko Bertsolari Txapelketa Nagusiaren finalean hasi zen dena...

Bai. Maialen Lujanbioren bertso horiek entzunda, Jexux Eizagirreri bururatu zitzaion, ideia ona litzatekeela horietatik abiatuta nobela grafiko bat egitea. Komentatu zidan ea egingo ote nuen, eta baietz esan nion. Bertso haiek gogoan neuzkan nik ere. Oso bertso mamitsuak ziren, eta oso bisualak. Gaia nola jorratu oso ondo asmatu zuen. Berreskuratzeko moduko hiru bertso ziren.

Bertso haietatik nobela grafikoa sortzea, erronka polita bezain zaila izango zen, ezta?

Nik baneukan komikigintzan zerbait luzea egiteko gogoa. Nobela grafikoa izateko labur xamarra da hau, baina luzea hala ere. Nola osatu erabakitzea ez zen erraza izan, bertsoak hasieran, erdi parean edo bukaeran jarri. Bukaera aldera jartzea erabaki nuen, baina konturatu nintzen horrek eskatzen zuela segida bat ere, bertsoetan kontatzen den gau horren ondorengo zerbait, istorioa ondo ixteko. 2021 urtean Gipuzkoako Foru Aldundiak antolatutako 'Egile Sariak' deialdiaren baitan diru laguntza bat jaso zuen 'Axpi'-k proiektu honetarako.

Garaion ekimenak sustatutako sormen prozesuetan parte hartu zuen: Katixa Agirre eta Harkaitz Canoren aholkularitza jaso zuen eta egonaldi bat egin zuen bertan.

2022 urteko Hernaniko Liburu Azokan aurkeztu zen albuma: Kroketak Podcastean kontatu zituen egileak komikiaren nondik norakoak.

2024ko maiatzean Tupust kolektiboak bere hirugarren eta azken antologia argitaratu zuen.

Ainara Azpiazu "Axpi" elkarrizketatu zuten Deia Egunkarian

Axpiren lana https://www.ainaraxpi.blogspot.com blogean ikus daiteke, baita Facebook-en ere

DATA	IZENBURUA	ARGITARATZAILEA	GIDOIA	MARRAZKIAK	JATORRIZKO HIZKUNTZA	ITZULTZAILEA	JATORRIZKOAREN URTEA
2022 URRIA	Utzi Azalari	Dobera	Ainara Azpiazu Axpi Maialen Lujanbioren bertso batzuk abiapuntutzat hartuta	Ainara Azpiazu Axpi	Euskaraz Jatorrizkoa		2022 URRIA
2020 ABENDUA	Foixeko Katalina	Nabarralde	Angel Rekalde	Ainara Azpiazu Axpi	Bi edizio, euskaraz eta gazteleraz	?	2020 ABENDUA

EUSKARAZ ARGITARATUTAKO ANTOLOGIETAN PARTE HARTZEA

DATA	IZENBURUA	ARGITARATZAILEA	GIDOIA	MARRAZKIAK	JATORRIZKO HIZKUNTZA	ITZULTZAILEA	JATORRIZKOAREN URTEA
2019 03 MARTXOA	Tupust! 1.	Txalaparta	Tupust! Kolektiboa	Tupust! Kolektiboa	Euskaraz Jatorrizkoa		2019ko Martxoa
2021 10 URRIA	Tupust! 2.	Tupust! Kolektiboa/Egilea editore	Tupust! Kolektiboa	Tupust! Kolektiboa	Euskaraz Jatorrizkoa		2021eko Urria
2016 04 APIRILA	Altza porru	Argia/Komunikazio Biziagoa	Obrarena Jakoba Errekondo Komiki bakoitzarena: Ainara Azpiazu Axpi, Asisko, Joseba Larratxe Josevisky, Iñaki Martiarena Mattin, Olariaga, Unai Gaztelumendi, Unai Iturriaga, Zaldieroa	Ainara Azpiazu Axpi, Asisko, Joseba Larratxe Josevisky, Iñaki Martiarena Mattin, Olariaga, Unai Gaztelumendi, Unai Iturriaga, Zaldieroa	Euskaraz jatorrizkoa		2016 04 APIRILA
2016 12 ABENDUA	H28 urdekaria Urtekari Paperitikoa		Adur Larrea, Aiert, Ainara Azpiazu Axpi, Aitor Egia, Aranagoiri, Aritz, Aritz Irigoien, Asisko, Beñat Etxaburu, Dani Fano, Edu Lartzanguren, Enekus Mus, Enok Sudupe, Eñaut Aiartzaguena, Exprai, Hasi,Hartzmarka, Iban Izagirre, Idoia Torregarai, Iren, Jojo Arratzukima,Jokin, Joseba Larratxe Josevisky, Laure Gomez, Marko, Mikel Orbegozo, Mr, Ñ, Ñk, Ogaxo, Patxi Gallego, Sustrai Errolan, Tomax, Tz, Unai Gaztelumendi, Unai Iturriaga, Xanmari, Zaldieroa, @Zital	Adur Larrea, Aiert, Ainara Azpiazu Axpi, Aitor Egia, Aranagoiri, Aritz, Aritz Irigoien, Asisko, Beñat Etxaburu, Dani Fano, Edu Lartzanguren, Enekus Mus, Enok Sudupe, Eñaut Aiartzaguena, Exprai, Hasi,Hartzmarka, Iban Izagirre, Idoia Torregarai, Iren, Jojo Arratzukima,Jokin, Josevisky, Laure Gomez, Marko, Mikel Orbegozo, Mr, Ñ, Ñk, Ogaxo, Patxi Gallego, Sustrai Errolan, Tomax, Tz, Unai Gaztelumendi, Unai Iturriaga, Xanmari, Zaldieroa, @Zital	Euskaraz Jatorrizkoa		2016 12 ABENDUA